Ժողովուրդն իմաստուն է
Խաղը նախատեսված է նախադպրոցական և կրտսեր դպրոցական տարիքի երեխաների համար: Այն զարգացնում է երեխայի բանավոր կապակցված խոսքը, հարստացնում բառապաշարը առած-ասացվածքներով, նպաստում համադրելու, վերլուծելու, տրամանբանելու կարողությունների զարգացմանը: Թեմատիկ նկարները հնարավորություն են տալիս կազմել փոքրիկ պատմություններ և ըստ իմաստի օգտագործել 40 առած-ասացվածքներ:
Յուրաքանչյուր առած կամ ասացվածք կազմված է երկուական քարտից: Խաղալու համար անհրաժեշտ է կտրատել բոլոր քարտերը: Խաղի կանոնը պարզ է. խաղի մասակիցները չորսն են, նախապես բոլոր խաղաքարերը շրջված դրված են սեղանին: Յուրաքանչյուր մասնակից վերցնում է չորսական քարտ՝ ամեն փուլի համար, և յուրաքանչյուր փուլում սեղանին բաց դրվում են ևս 4 խաղաքարտեր: Հերթով երեխաները սեղանին դրված և իրենց ձեռքին ունեցած քարտերով կազմում են ամբողջական առածը կամ ասացվածքը: Եթե հարմար տարբերակ չունեն, ապա մեկ քարտ դնում են սեղանին, որը կարող է վերցնել հաջորդ մասնակիցը՝ կազմելով ամբողջական առած կամ ասացվածք: Հաղթում է նա, ով շատ առած կամ ասացվածք է կազմում:
Ճտերն աշնանն են
հաշվում:
Ագռավի ճուտը
իր մոր համար ազիզ է:
Աղվեսի վկան
իր պոչն է:
Ամեն շուն
իր դռանն է հաչում։
Անտեր ուլերին
գայլը կուտի։
Երկաթը տաք-
տաք կծեծեն։
Աղվեսի դունչը չհասավ խաղողին,
ասաց՝ խակ է:
Փորձված աղվեսը
երկու ոտքով է թակարդն ընկնում:
Գյուղ կանգնի՝
գերան կկոտրի:
Գորտի երեսին թքեցին,
ասաց՝ անձրև է գալիս:
Խելքը ոսկե թագ է,
ամեն մարդու գլխին չի լինում։
Կատվի խաղը
մկան մահն է:
Ձու գողացողը
հավ էլ կգողանա:
Ձուկը ջրում
առևտուր չեն անում:
Մեղր, մեղր ասելով`
բերանդ չի մեղրոտվի:
Ուզողի մի երեսն է սև,
չտվողի՝ երկուսը:
Էշի բեռը ինչքան ծանր լինի,
այնքան արագ կգնա:
Ով աշխատի,
նա կուտի:
Գարի ունես`
քո ձիերին տուր:
Խոզի քթին
ադամանդ չի սազի:
Ծառի տակին պառկելով`
բերանդ տանձ չի ընկնի:
Արջը յոթ երգ գիտի,
յոթն էլ մեղրի մասին:
Ուրիշի տակ փոս փորողն
ինքն է փոսն ընկնում:
Քաղցր լեզուն
օձին բնից կհանի:
Կարմիր կովն
իր կաշին չի փոխի:
Դատարկ հասկը
գլուխը ցից կպահի:
Ձեռքը ձեռք կլվանա,
երկու ձեռքը՝ երես:
Ձու ածող հավը
կչկչան կլինի:
Խելոք գառը
երկու մոր կաթ կխմի:
Ամեն անգամ գետը
գերան չի բերի:
Աղքատը, որ հավ կուտե,
կամ հավն է հիվանդ,
կամ աղքատը:
Արևն ամպերի տակ
երկար չի մնա:
Աշխատանքը
գեղեցկացնում է մարդուն:
Ալյուրը մենք մաղեցինք,
փախլավան կերան ուրիշները:
Թրի կտրածը կլավանա,
լեզվի կտրածը չի լավանա:
Ինչ ցանես,
այն էլ կհնձես:
ճանճից
փիղ են սարքում:
Մի ծաղկով
գարուն չի գա:
Անպտուղ ծառը կկտրեն,
պտղատու ծառին քար կգցեն:
Յոթ չափի՛ր,
մեկ կտրի՛ր:
