12+  Свидетельство СМИ ЭЛ № ФС 77 - 70917
Лицензия на образовательную деятельность №0001058
Пользовательское соглашение     Контактная и правовая информация
 
Педагогическое сообщество
УРОК.РФУРОК
 
Материал опубликовал
Давлетова О.Р.17

Давлетова О.Р., учитель удмуртского языка и литературы,

МБОУ ООШ с. Каймашабаш Янаульского района,

Республика Башкортостан



«Куча мала»

(внеклассное мероприятие на удмуртском языке, посвященное международному Дню родного языка)

«Огыр-бугыр»

(анай кыллэн калыккуспо Нуналэзлы сӥзем ужрад)

Азьмугез: удмурт кылэн тунсыкъяськон мылкыдзэс пуромытон.

Пуктэм ужпумъёс:

Дышетон: калыкылосэз но удмурт лулчеберетэз яратон мылкыд пыӵатоно.

Азинтон: вераськон кылэз волятоно.

Визьнодан: удмурт кылмылы яратон но гажан мылкыд пыӵатоно.

Уже кутэм арбериос: ноутбук, проектор, доска вылэ интыямын пӧртэм буёло но номеро треугольникъёс, дасяны луоз нимысьтыз презентация сётэм ужъёсын.

t1619115522aa.gif



Ужрадлы дасяськон этап.

Дасяно пӧртэм буёло кагазлэсь 16 треугольник, вылазы гожтоно лыдпуссэ. Котькуд треугольник сьӧрын гожтэмын ужлэн нимыз:

Визькылъёс

Шудпуйы!

Тодма крезьгурез

Удмурт гожъясьёс

Удмурт базар

Сюрес сётэ мукетъёслы!

Куинетӥез мултэс

Башкортостанысь удмуртъёс

Эктом али!

Ӵыжы-выжы

Крезьгур вис

Вуюись

Улэм-вылэм выжыкыл

Зоопарк

Нюлэскы ми ветлыса

Шаертодон

Ӵошатсконэ пыриськыны быгатозы 7-9 классъёсысь 5-6 команда 3-4 адямиен. Нырысь ваньзы пукозы залын. Соос дасяны кулэ плакат-транспарант, кытын гожтэмын луыны кулэ командазылэн нимыз (кылсярысь, «Тодосчи», «Небыльток», «Азё-беро уробо» но мукет) Командаослы нимысьтыз дасяськем кулэ ӧвӧл (плакат сяна). Луоз на дэмланы ужрадэ удмурт дӥськутэн лыктыны.

Ужрадлэн мынэмез.

Ужрадэз нуись: Умоесь, гажано пиналъёс, лыктэм куноос! Асьме ужрадмы туннэ сӥземын анай кыллэн калыккуспо нуналэзлы. Со пусйиське 21-тӥ тулыспалэ. Анай кыллэсь нуналзэ пусйыны кутскизы ЮНЕСКО огазеяськонлэн ӵектэмезъя 2000-тӥ арысен, дуннеысь калыкъёслэсь кылзэс, сям-йылолъёссэс утён но азинтон вылысь. ЮНЕСКО-ысь ӧнерчиослэн ивортэмзыя, дуннеысь 6 000 кылъёс пӧлысь ӝыныез матысь дыре берпуметӥ вераськисьсэс ыштыны быгатозы. Тужгес но вӧлмемын 7 «дунне» кылъёс – англи, испан, араб, ӟуч, фрунцуз, немец, португали. Соос трос улосъёсын пумисько. Китай, хинди но урду кылъёс но валтӥсьёсыз пӧлы пыро, но калыккуспо вераськонын шер кутӥсько. Тодосчиослэн верамзыя, 100 арскын 3 000-ысен 6 000-озь кылъёс ышыны быгатозы. 100 000-лэсь трос адями гинэ вераськизы ке, утьыны быгатозы анай кылзэс. Туннэ бырон калэ вуэмын 400 кылъёс. Соосын верасько арлыдоос гинэ. Кылсярысь, Уйпал Америкаын канса но чинук кылъёсын 20-лэсь ӧжыт адямиос верасько. Жаляса верано, удмурт кылмес но анай кылэн лыдъясьёс арысь аре кемо. Но мон оскисько, тӥ анай кылдэс яратӥськоды но гажаськоды.

Та нуналэ мон тӥледыз ӧтисько «Огыр-бугыр» нимо ӵошатсконэ пыриськыны. Залын пуко командаосмы. Мон малпасько, котькуд командалэн мылкыдыз ӝутскемын татчы, сцена вылэ, ожмаськыны потыны. Ӝутэ кияды нимъёстэс. Кин самой зол быгатӥз мынэсьтым синме кыскыны, мынам сюлэмам яраны – со ик потоз нырысетӥ ожмаськонэ (кин кесяське, кин чабе, кин кырӟа – ужрадэз нуись ӧте сцена вылэ 2 командаосты)

2 команда залысь потэ. Одӥгез быръе кудзэ ке треугольникез. Бадӟым куараен лыдӟе, мар отын гожтэмын. Собере ужрадэз нуись валэктэ, кызьы быдэстоно та ужез. Вормись командалы треугольник сётӥське, соос кылё сцена вылэ. Кинэн ожмаськыны вуоно конкурсын - быръе табере вормись команда. Командаос озьы ик «асьсэдыз возьмато» залын. Командаос куд-ог ужъёсын быгато одӥг кадь кужымзэс возьматыны, соку треугольникез шори вандыса сётӥськом кыкез но командалы, но соос кыксы ик пуксё залэ. 3 треугольникъя номыр но кароно ӧвӧл (2,6, 11секторъёс), соосты озьы ик шори люкыса сётоно командаослы, нош шудӥсьёс пуксё. Ужрадэз нуись залысь нош ик быръе 2 команда.

Кулэ луоз ог кык музыкальной номер. Сое дасяны быгатозы школаысь усто кырӟасьёс но эктӥсьёс.

Ӵошатсконлэн йылпумъянэз луэ люкам кагазъёсты лыдъян. Кинлэн тросгес треугольникез, со ик вормись.

Ужъёслы валэктон.

Визькылъёс. Шедьтоно визькылъёслэсь пумзэ.

Ӟег кизьыса,

калык но ӟеч

Кин ужтэк -

чабей уд ара

Ачид ке ӟеч,

сяська но тӧлӟе

Пичи ке но ужед,

со няньтэк

Дырыз ортче ке,

ужтэмлэсь уж 



Шудпуйы! Таиз кесэг шуд ваись луэ: номыр но карытэк, командаослы шори карыса сётиське таиз треугольник (луоз шудонэз азьпалтыны та командаосын ик, луоз залысь 2 выль команда бырйыны).

Тодма крезьгурез. Луоз сётыны туала тодмо удмурт артистъёслэсь ог 5 минусовказэс (А. Тимерханова, Н. Анисимов, И Котельников, но мукет) Верано кырӟанлэсь но кырӟасьлэсь нимзэс.

Удмурт гожъясьёс. Кудаз чурын гожтэмын Башкортостанысь удмурт гожъясьёс?

а) И. Байметов, В. Романов, Ф. Пукроков

б) У. Бадретдинов, В. Кельмаков, Р. Хайдаров

в) И. Байметов, У. Бадретдинов, Р. Валишин

г) У. Бадретдинов, А. Гильмаев, З. Биишева

Удмурт базар. Луоз курыны школа музейысь ог 10 арбери, кылсярысь: кут, тушко, аръян вышкы, куиськон станоклэсь детальёссэ (кись, вырт, сысо), ӝӧккышет, ӵушкон, удмурт нылкышно дэрем, айшет но мукет. Командаысь котькудӥз «базаре мыныса» маке но басьтэ, валэктыны быгатоно – ма со, марлы кулэ, кытын кутӥське.

Сюрес сётэ мукетъёслы! Таиз кесэг – шудтэм кесэг. Треугольник кыле ужрадэз нуись кие, шудӥсьёс залэ пуксё.

Ньылетӥез мултэс. Быръёно мултэс кылэз, валэктоно – малы сое мултэсэн лыдъяськоды?

а) Дангыр, Омель, Дыдык, Бетко;

б) Зангари, инвожо, вукарнан, италмас;

в) Удмурт, вепс, чуваш, пор.

Башкортостанысь дано удмуртъёс. Тодӥськоды-а, кин луо та адямиос – асьме землякъёс? Быръёно кулэ чуръёсты (ужрадэз нуисьлы луоз на ватсаса вераны та дано адямиос сярысь)

Ахтариева Людмила Менлатшиновна

писатель

Садиков Ранус Рафикович

писатель, журналист

Галямшин Ренат Биктимирович

Удмуртиысь калык артист, «Италмас» ансамбльысь солистка

Бадретдинов Ульфат Шайхутдинович

тодосчи, исторической наукаосъя доктор, профессор

Валишин Роман Галяскарович

Башкортостанысь удмурт центрлэн кема аръёс ӵоже тӧроез



Эктом али! Сётыны луоз ог 5 эктон крезьгур пӧртэм калыкъёслэсь (удмурт, башкир, пор, татар, ӟуч). Кин устогес эктоз? Верано на, кыӵе калыклэн та эктонэз.

Ӵыжы-выжы. Сётэм кылъёс пӧлысь быръёно удмуртлы матысьёссэ (соос финно-угорской группае пыро): белорус, пор, бигер, чуваш, вепс, ханты, бурят, француз, венгер, финн, эстон, латыш, карел, поляк, болгар.

Крезьгур вис – шутэтскон вис. Школаысь коллективлэсь ог 2 музыкальной номер. Треугольникез шори карыса сётоно сцена вылэ кемдэм командаослы.

Вуюись. Кудаз чурын шонер гожтэмын вуюисьэн буёлъёсыз? Берыктоно ӟуч кылэ быръем чурысь буёл нимъёсты.

а) горд, бусӥр, ӵуж, вож, лыз, чагыр, курень б) горд, напӵуж, ӵуж, вож, чагыр, лыз, бусӥр в) горд, сыр, ӵуж, вож, чагыр, лыз, бусӥр с) горд, напӵуж, ӵуж, вож, лыз, чагыр, курень

Улэм-вылэм выжыкыл. Ог 3 удмурт выжыкылъёсысь люкетсэ лыдӟе ужрадэз нуись. Тодоно, кыӵе выжыкылысь басьтэмын лыдӟем люкет.

Зоопарк. Презентацие дасяно ог 10 пудо-животъёслэсь яке тылобурдоослэсь суредъёссэс (кион, ӵушъял, лудкеч, маймыл, дуэ, ӟольгыри, пислэг, ӧрӟи, шырчик, коӵо). Верано, кинъёс возьматэмын.

Нюлэскы ми ветлыса. Берыктоно удмурт кылысь ӟуч кылэ писпу нимъёсты: бадяр, кызьпу, пужым, кыз, пипу, беризь, сусыпу, ньылпу, сирпу, бадьпу. Озьы ик луоз возьматыны та писпуослэсь суредзэс презентациын.

Шаертодон. Сётэм юанъёслы ответ гожтоно:

а) Башкортостанын кыӵе ёросъёсын уло удмуртъёс?

б) Гожтэ удмуртъёслэсь пӧраськем нимъёссэс (удмуртские блюда)

в) Кыӵе сяська удмурт калыклэн символэз луэ?

г) Удмуртъёслэн яратоно буёлъёссы, кудъёсыз кутэмын кун символикаын?

Ужрадэз йылпумъян.

Ӵошатсконлы йылпумъян лэсьтон, пусъёно вормисьёсты. Кинлэн тросгес треугольникез, со ик вормись. Ужрадэз йылпумъяны луоз Е. Минигараевалэн «Анай кылын» кылбуреныз:

Тон вазь мыным анай кылын, Тон кырӟа, вера мылкыддэ. Уно кылъёс та дуннеын, Нош удмуртэз юнгес шунтэ. Но удмуртэз – анай тусо, Ненег, валась, сыӵе мусо! Тон вазь мыным удмурт кылын, Тон вазь мыным анай сюлмын!










Опубликовано


Комментарии (3)

Потамошнева Наталья Алексеевна, 22.04.21 в 21:48 2Ответить Пожаловаться
Везёт тем, кто владеет языком)))
А мне в помощь переводчик(((
Давлетова О.Р., 26.04.21 в 16:59 1Ответить Пожаловаться
Я хотела помочь учителям удмуртского языка))) У нас так мало методических материалов...
Потамошнева Наталья Алексеевна, 26.04.21 в 19:50 1Ответить Пожаловаться
Похвально!
!Экспертов со знанием удмуртского языка, полагаю, тоже не очень много)
Чтобы написать комментарий необходимо авторизоваться.