Предложениела бекI членти ("Главные члены предложения в даргинском языке")

Бух1набуц:

Подлежащее

Сказуемое

Царка сказуемое

Цалабяхъ сказуемое

Объект

Подлежащее

Предложениелизи кадерхурли, чуни чиди-биалра ца белгиси суайс жаваб лугути дугьбас предложениела членти бик1ар. Предложениелизи каберхихьалли, сунени ца белгиси суайс жаваб х1елугуси дев предложениела член ах1ен.

Предложениела членни х1ебирар союз, кесек, междометие. Царх1ил дев барх агалли, сабицун предложениела членни биэс х1ебирар послелогра. Предложениела лерил членти дурт1ули сари к1ел кьукьяличи: бек1 членти ва к1иибил даражала членти бик1ути. Бек1 членти сари: подлежащее, сказуемое, объект. К1иибил даражала членти сари: определение, аги-кьяйда, дополнение. К1иибил даражала члентала х1янчи, чиди-биалра бек1 член яра сабигъуна к1иибил даражала член баянбарни, предложениела мяг1на имц1али т1инт1барни, г1ячихъбарни саби.

Подлежащее предложениела бек1 член саби, суненира предложениелизиб буруси баркьуди, анц1букь яра х1ял сунезибад биубси, бируси сек1ал иргъахъуси. Подлежащеели жаваб луга чи? се? чини? сели? ибти суалтала цалис. Масала: Дирихьла (се?) к1ана (подлежащее) багьлали ахъбиуб. (се?) Вац1а (подлежащее) шинишли саби. Дудешли (подлежащее) уршиличи кагъар белк1ун. Пушкин (подлежащее) халаси поэт сай. Дяг1ли (подлежащее) галга гъят1аиб. Нуни сочинение лук1улри. Чебиуливан, дарган мезла подлежащее имц1аливан уйхъу падежлизибра актив падежлизибра башар. Эгер сказуемое дигес ибси глаголли аргъахъили биалли, дарган мезла подлежащее лугу падежлизибра башар ва чис? селис? ибти суалтала цалис жаваб луга. Масала: Наб (чис?) дила неш дебали дигахъис.

Дарган мезлизиб подлежащее иргъахъу сказуемое чебх1ебурхуси царка глаголли аргъахъибх1ели уйхъу падежличилси, сказуемое грамматически чебх1ебурхуси, амма мяг1налашал чеббурхуси учибяхъ глаголли аргъахъибх1ели актив падежличилси существительноели, масала: 1) Урши вак1иб. 2) Дудешли уршилизи т1амадариб. Сказуемое чебх1ебурхуси глаголли аргъахъибх1ели, подлежащее иргъахъу уйхъу падежла мерлаб бак1ибси хас падежлира, эгер сунени, предложениелизиб уббатурси подлежащеели биубси уйхъу падежлизибси девли кьяйда, уйхъу падежла суайс жаваб лугули биалли. Илх1ели иличил сказуемое жинс-кьадарлизибра балбиркур. Масала: Ишбарх1и нушачибад Ахъушала адамти арбякьун. (Ишаб подлежащее «адамти» ибси дев саби, илини «чи?» ибси суайсра жаваб лугули саби. «Ахъушала» ибси дев биалли, «адамти» ибси девлис определение саби, «чила?» ибси суайс жавабра лугули.)

2) Ишбарх1и нушачибад ахъушала арбякьун. (Гьанна ишаб «ахъушала» ибси дев определение ах1енну, подлежащее саби, «адамти» ибси девла мерлаб бак1или – илала мер буцили. Сунени «чи?» ибси суайсра жаваб лугули саби.) Илдигъунти сари эргъити предложениебира:

3) Даг нушачи ц1удхъурла бак1иб.

4) Бутрила кабаиб. 5) К1арахъала лябкьули саби ва ц.

Илкьяйдали, хас падеж подлежащеели бируси, шимала адамти, чидни-биалра халкь иргъахъуси дев биалли саби.

Царх1ил тях1ярла девра хас падежлизиб подлежащеели бирар царх1илти дугьбачил барх:

Бит1ак1ибх1ели, шел кило нерхла бак1иб ва ц.

Эгер сказуемое чеббурхуси глаголли аргъахъили биалли (глагол царка биаб, учибяхъ биаб), подлежащее иргъахъу актив падежличилси существительноели, масала: 1) Дяг1ли шят1 белч1ун. 2) Мусани г1ях1си хабар пикрибариб. 3) Нуни (х1уни, итини) масъала арзилри.

Сказуемое дигес ибси глаголличил аргъахъибх1ели, лугу падежличилси существительноера подлежащеели бирар, масала: 1) Каримлис уч1ес дигули сай. 2) Нушала улкализир дахъал сагати юртани, зубра фабрика-заводуни дирули диъни ва илаб х1янчизарти г1яг1нили биъни пикрилизи касили, бахъалгъунти гьалмагъунас строительти бетаэс дигулри.

Подлежащее аргъахъили бирар дек1ар-дек1арти гъайла бут1нани: существительноели: (Рузи имтих1янтачи х1ядуррик1улри); местоимениели: (Ну уч1улра); прилагательноели: (Х1унт1енаби ца шайчибри); числительноели: (Шел дураиб); причастиели: (Вак1ибси нушачирра х1еризур); масдарли: (Вак1ни г1ях1си саби); инфинитивли: (Кайхьи уч1ес асух1ебирар.)

Подлежащее иргъахъу чумал девла цалабиклира:

К1ел существительноела цалабикли (цалабяхъ существительноели): Нушачир хьунул адам мурул адамличил цугси сари.

Существительноела ва числительноела цалабикли: К1елра юлдаш бек1лил цаличи ца мешути ах1енри. Бит1ак1ибх1ели, х1ябал кило нерхла бак1иб.

К1ел числительноела цалабикли: К1ина к1ел авал сари. К1иличи х1ябал шел дирар.

Числительноела мерлаб бак1ибси местоимениела ва существительноела цалабикли: Чумал адам бак1иб.

Чедиб нушани чебаили кьяйда, дарган мезла предложениела каргьни х1ябал тях1ярла саби:

1.Подлежащее уйхъу падежли аргъахъибси предложениела каргьнилис уйхъу падежлизибси каргьни (номинативная конструкция ) бик1ар;

2. Подлежащее актив падежли аргъахъибси предложениела каргьнилис актив падежличилси каргьни (эргативная конструкция) бик1ар;

3. Подлежащее лугу падежли аргъахъибси предложениела каргьнилис лугу падежличилси каргьни (дативная конструкция) бик1ар.

Урус мезлизиб биалли, ца номинативная конструкция саби лебси.

Сказуемое

Сказуемое предложениела бек1 член саби, суненира подлежащеелизибад биубси, бируси баркьуди, анц1укь яра иличибси х1ял чебиахъуси. Сказуемоели жаваб луга сек1ай се бирулив? Ил сегъуна сабив? Ил чила сабив? Ил чинаба? Ибти ва илдигъунти царх1илти суалтала цалис. Масала: 1) Дирихьла к1ана пашбехъуб. 2) Ц1ара шинни бирц1ур. 3) Кагъар ц1уба саби. 4) Иш г1ях1си жинсла кьял саби. Сунела цалабикни х1ясибли сказуемое к1ел журала саби: царка сказуемое ва цалабяхъ сказуемое.

Царка сказуемое

Царка сказуемое саби ца девли аргъахъибси сказуемое. Предложениелизиб царка сказуемое иргъахъу глаголла чиди-дигара наклонениеличил, глаголла формаби: деепричастие, причастие, глагол существительноеличил ва глаголла мерличиб бак1ибси царх1ил девличил, масала: 1) Х1еб садаиб (хабар наклонение). 2) Мухтар, унза абхьа (амру наклонение). 3) Дудеш х1янчила арякьуну? (суал наклонение). 4) Ит вак1алри (шарт1 наклонение), нура лявкьяси (следствиела наклонение). 5) Х1у вашули виадри (шарт1 наклонение), нура вашаси (следствиела наклонение).

Чебх1ебурхуси глаголличил, глагол ах1енси царх1ил девличил аргъахъибси сказуемое жинслизиб, кьадарлизиб ва бях1лизиб подлежащееличил балбиркур, эгер ил глагол-сказуемое (сказуемоели биубси царх1ил дев) илди х1ясибли барсбик1уси биалли:

Даг Зайнаб заблизи рикиб.

Г1яли, х1у чина вякьунрив?

Дурх1ни, иша даширая!

Г1умар, х1ечив вишт1алу?

Дуги мазаличи бак1ибси бец1рив?

Жинслизиб барсх1ебик1уси глаголличил аргъахъибси сказуемое жинслизиб, кьадарлизиб подлежащееличил балх1ебиркур. Жинслизиб барсх1ебик1уси глагол ах1енси царх1ил девличил аргъахъибси сказуемое биалли, подлежащееличил жинслизибцун балх1ебиркур:

Дудеш шагьарлизи аркьян.

Неш хъайг1ир калун.

Т1ул алун.

Аркьуси нура.

Бях1яни х1ясибли барсх1ебик1уси глаголличил аргъахъибси сказуемое бях1лизиб подлежащееличил балх1ебиркур:

Ну уч1улри.

Х1у уч1улри.

Сай уч1улри.

Х1у вак1или виадри, нура вак1иши.

Ну вак1или виасри, итра вак1иши.

Подлежащее инфинитивли аргъахъили биалли, сказуемое иличил селизибалра балх1ебиркур:

Кайхьи уч1ес асух1ебирар.

Ванзала удив шахтализивван ах1и, ванзала чедив узес, марлира, азирналичибра гьамадли саби.

Цалабяхъ сказуемое

К1ел яра чумал девли аргъахъибси сказуемоелис цалабяхъ сказуемое бик1ар. Цалабяхъ сказуемое х1ябал журала бируси саби : глаголличилси, уличилси ва наречиеличилси. Илала ца бут1али бек1 мяг1на бух1набурцу, итил бут1али (кумекла глаголли) – грамматикаласи. Масала: Нушала унра агроном сай. Гьанна Пат1иматли царх1ил г1ямал баргес асубирар.

Уличилси цалабяхъ сказуемое

Уличилси цалабяхъ сказуемое саби, эгер сунела бек1 мяг1на бух1набуцибси бут1а существительноели, прилагательноели, числительноели, местоимениели аргъахъили биалли. Масала: Вак1ибси дила дудеш сайри. (существительное). Сагаси машина шиниша саби. (прилагательное). Иш жуз дила саби. (местоимение). Т1ашти уршбазивад Макьсуд к1иэсил сай. (числительное).

Глаголличилси цалабяхъ сказуемое

Глаголличилси цалабяхъ сказуемоела к1елра бут1а глаголли аргъахъили дирар. Бек1 мяг1на бух1набуцибси гьалабси бут1а глаголла формабани (причатие, деепричастие, масдар, инфинитив) дирар. К1иибил бут1ара саби глаголли бирар. Масала: Шагьдат рузес х1ерира. Г1ялихан лявкьуси сай. Дила бек1либиубсигъуна мурад узни саби. Маллубани булгес бе1бихьиб. Илх1ели ну усули вирус.

Наречиеличилси цалабяхъ сказуемое

Нареличилси цалабяхъ сказуемое саби сунела бек1 мяг1на бух1набуцибси дев наречиели аргъахъили биалли. Масала: Итала аги ункъли саби. Хъулиб ванали ах1ен.

Объект

Объект предложениела бек1 член саби, суненира предложениелизиб буруси баркьуди сунечи чеббурхуси сек1ал чебиахъуси ва чи? се? ибти У.п.суалтас цалис жаваб лугуси. Масала: Рурсили (се?) далай белч1ун. Нуни юлдаш (чи?) разиварира.

Объект иргъахъу подлежащее иргъахъути гъайла бут1нани. Масала:

Существительноели: Дудешли хабар буриб.

Существительноела мерлар яра илала мяг1нализир дак1ибх1ели;

Местоимениели: Х1уни се бирулрив ишаб? Ишбарх1и бригадирли колхозла х1янчила чи бархьаиба?

Прилагательноели: Учительли бишт1ати буч1ахъули сай.

Числительноели: Вец1ал к1иличи дут1а.

Инфинитивли: Нуни суратик1ес багьурра. Наб уч1ес дигулра.

Объект иргъахъу причастиелира: Нуни дуц1бик1ути чебиулра.

Объект иргъахъу чумал девла цалабиклира:

Илини к1ел хъали дуциб. 2) Г1яяркьянани х1ябал бец1 кадушиб.

Объект аргъахъили бирар ч1янк1ли уйхъу падежла формализибси существительноели яра илала мерлаб бузуси царх1ил девли.

Объект сказуемоеличил жинслизиб ва луг1илизиб балбиркур. Масала: Нуни узи варгира. Мажидли дурх1ни кабукиб.

Объект биэс бирар сказуемое чеббурхуси глаголли аргъахъибси ва подлежащее Актив яра (цацах1ели хасти анц1букьуназиб) Лугу падежла формали аргъахъибси предложениелизиб. Масала: Нуни (А.п) гьанк1 ахъира . Наб (Л.п.) ит дигахъис.

Пайдалабарибси литература:

Х1ясанова У.У. «Дарган мезла практический курс» (студентунас пособие), Мях1ячкъала-2010 ​​​​​​​

Сулейманов Б.С. «Дарган мезла синтаксис» (студентунас пособие), Дагучпедгиз-1966