II Всероссийский конкурс для учителей татарского языка и литературы на лучшую методическую разработку «Мультимедиа-урок»

ИГАНӘЧЕ – ТАТАРСТАН КИТАП НӘШРИЯТЫ

Татарстан китап нәшрияты – Россиянең иң эре милли нәшриятларының берсе. https://tatkniga.ru

2019 елда басмаханә 100 еллыгын бәйрәм итәчәк. Нәшриятның ассортименты бай: татар, рус һәм инглиз телләрендә фәнни-популяр һәм матур әдәбият, укыту-методик басмалар һәм хрестоматияләр, төрле яшьтәге балалар өчен күптөрле китаплар.

ҖИҢҮЧЕЛӘРГӘ БҮЛӘКЛӘР

I урын – Рифат Сәлахның «Җәлил варислары» китабы һәм «Мәктәпкәчә яшьтәге балалар өчен кагыйдәле хәрәкәтле уеннар» җыентыгы (авторлары Г. Шакирова һәм Г. Хузаханова) .

Җәлил варисларына   Әлеге китап бөек татар шагыйре, Советлар Союзы герое Муса Җәлилгә багышланган. Җыентыкта Муса Җәлил шигырьләре белән беррәттән, кроссвордлар, ребуслар, интеллектуаль уеннар, биремнәр бар.

Мәктәпкәчә яшьтәге балалар өчен кагыйдәле хәрәкәтле уеннар   Әлеге җыентыкта балалар бакчасының төрле төркемнәрендә уйнарга мөмкин булган хәрәкәтле кагыйдәле уеннар тупланган. Беренче тапкыр 1940 елда басылып чыккан китаптан, үз чорына хас булган, коммунистик тәрбия нигезләрен аңлаткан өлешләре төшерелеп калдырылды, уеннар тәртибе үзгәртелмәде.

II урын – «Мәктәп сәхнәсе өчен пьесалар» җыентыгы һәм Гөлсинә Ясабиеваның «Шигъри физкультминутлар» методик кулланмасы.

Мәктәп сәхнәсе өчен пьесалар   Бу җыентыкта мәктәп сәхнәсендә куяр өчен гыйбрәтле, хикмәтле, шаян драма әсәрләре тупланган. Китап укытучылар өчен дә, укучылар өчен дә, китап сөючеләр өчен дә кызыклы булыр. Сертотмас үрдәкнең ничек итеп исән калуын, Су анасы белән Шү рәленең мәхәббәт тарихын, практикант кыз Алиянең укучыларга онытылмас сабак бирүе хакында беләсегез килсә, әлеге җыен тык сезнең өчен!

Шигъри физкультминутлар   Әлеге методик кулланмада автор-методистның мәктәптә һәм яр Чаллы педагогия көллиятендә эшләгән елларында иҗат ителеп, практикада сынап каралган физкультминутлары бирелә. Кулланма башлангыч мәктәп һәм татар теле укытучыларына, әти-әниләргә, педагогик уку йортында белем алучы студентларга адреслана. Милли балалар бакчаларында эшләүче тәрбиячеләргә дә файдалы булыр.

III урын – Ф.М. Зиннурованың «Бала сөйләмендәге кимчелекләрне төзәтү» методик кулланмасы һәм Лилия Дәүләтшинаның «Балаларга җырлар һәм уеннар» җыентыгы.

Бала сөйләмендәге кимчелекләрне төзәтү   Кулланмада, балалар авыз иҗатына һәм язучыларыбыз әсәрләренә нигезләнеп, авазларның дөрес әйтелешен ныгыту, сүзлек байлыгын арттыру, сөйләм кимчелекләрен төзәтү күнекмәләре бирелә. Китап мәктәпкәчә һәм кече яшьтәге мәктәп балалары белән эшләүче логопедларга һәм укытучыларга тәкъдим ителә.

Балаларга җырлар һәм уеннар   Китап балаларның яшь үзенчәлекләрен исәпкә алып төзелгән һәм ата-аналарга, тәрбиячеләргә ярдәмлек буларак тәкъдим ителә.

IV урын – «Шигъри әлифба» җыентыгы һәм  Николай Максимовның «Укыйбыз, сөйлибез, сөйләшәбез» укыту кулланмасы.

Шигъри әлифба   Әлеге җыентыкка һәр хәрефкә багышланган кызыклы табышмаклар керде. Китап шулай ук балаларны хайваннар дөньясы белән таныштыру өчен дә менә дигән ярдәмлек.

Укыйбыз, сөйлибез, сөйләшәбез   Мәктәпкәчә һәм кече яшьтәге мәктәп балалары белән шөгыльләнер өчен әти-әниләргә, тәрбиячеләргә тәкъдим ителә торган бу кулланма Казан (Идел буе) федераль университеты доценты Николай Максимовның «Сөйләм калыпларына нигезләнеп, татар теленә өйрәтү технологиясе» (Татарстан китап нәшрияты, 2015) дигән фәнни-методик хезмәте буенча төзелде.

V урын – «Татар халык табышмаклары» (авторы Хуҗиәхмәт Мәхмүтов) һәм Люция Закирҗанованың «Бергә уйнавы рәхәт!» уеннар китабы.

Татар халык табышмаклары   Фольклорчы-галим Хуҗиәхмәт Мәхмүтов төзегән «Татар халык табышмаклары» дигән бу китапка барлыгы 2280 табышмак туплап бирелде.

Бергә уйнавы рәхәт!   «Бергә уйнавы рәхәт!» мәктәпкәчә яшьтәге балалар өчен кызыклы уеннар китабы баланың үсешенә ярдәм итә торган 16 дәрестән гыйбарәт. Эчтәлеге һәм максатлары буенча алар мәктәпкәчә яшьтәге балаларның танып белү, иҗади һәм аралашу мөмкинлекләрен үстерүгә юнәлдерелгән. Китап психологларга, башлангыч мәктәп укытучыларына, тәрбиячеләргә һәм ата-аналарга тәкъдим ителә.

Жюри әгъзалары тарафыннан кабул ителгән, ләкин призлы урын ала алмаган методик эшкәртмәләр авторларына электрон Сертификат юлланачак.

Конкурста тәкъдим ителгән методик эшкәртмәләрне бәяләгән жюри әгъзаларына электрон Диплом һәм шәхси рейтингка +100 балл каралган.

Призлы урыннар яулаган катнашучыларга электрон форматта Җиңүче дипломы һәм шәхси рейтингка +100 балл каралган.